O Tribunal Supremo dálle a volta ao que resolveu a instancia inferior no caso das peaxes que a concesionaria da AP-9 cobrou, entre febreiro de 2015 e xuño de 2018, a pesar dos atascos reiterados que provocaron as obras de ampliación da ponte de Rande.

O Alto Tribunal, nunha sentenza que se publicou este martes, estimou o recurso presentado pola Fiscalía e obriga a Audasa a devolver as peaxes cobradas aos usuarios da autoestrada afectados por 81 incidencias durante estas obras.

Os maxistrados da Sala do Civil revogan así a sentenza da Audiencia de Pontevedra que dera a razón á compañía, despois de que esta recorrese o resolto polo Xulgado do Mercantil número 1 de Pontevedra que tamén avalaba a devolución desas peaxes.

O Supremo, por tanto, confirma integramente a sentenza de primeira instancia, que ademais de considerar «abusiva» a actuación de Audasa, ordenáballe a devolución a todos os consumidores das cantidades «indebidamente pagadas».

«A concesionaria da autoestrada cobra integramente a peaxe, a pesar da realización de obras que entorpecen unha circulación fluída, constitúe unha práctica non consentida expresamente», destacan na resolución.

Consideran que houbo falta de información por parte da concesionaria e recoñecen que os usuarios do vial «non consentiron a práctica de cobrarlles integramente a peaxe a pesar da defectuosa prestación do servizo porque non tiveron a facultade de decidir, ao non dispoñer da información pertinente sobre a incidencia do tráfico».

A sentenza considera probado a «falta de reciprocidade» e «desequilibrio» que se produce entre os dereitos e obrigacións de concesionaria e usuarios. O Supremo di ademais que Audasa tiña a obriga de informar das incidencias con antelación suficiente para que o condutor puidese decidir coller ou non a autoestrada.

«Unha autoestrada é un contrato mercantil dunha prestación de rapidez, fluidez, seguridade. Neste caso non se cumpriron. A autoestrada era insegura, había obras. A autoestrada era lenta, e iso supón que o importe que se estivo cobrando non tiña dereito Audasa a cobralo», di Diego Maraña, presidente da Asociación de Consumidores En-Colectivo.

Os afectados deberán acreditar esta condición documentalmente, concretamente, que son consumidores da vía, que circularon por ela nas datas establecidas e as cantidades abonadas polas peaxes. Non se sabe con certeza cantos usuarios poderán reclamar os cartos. No seu día, 300 condutores acreditaron o pago das peaxes que agora se consideran indebidas.

«Ou ben, de xeito voluntario, inicia as devolucións aos afectados ou nós, como asociación de consumidores iniciaremos unha demanda de execución á que poderán adherirse todos os afectados que xustifiquen os pagos indebidos», afirma Diego Maraña, presidente da Asociación de Consumidores En-Colectivo.
A sentenza é firme.